17 yıl apis cezasına mahküm etilgen qırımtatar faali ve siyasetçisi Nariman Celâl Qırımda işğal etilgen topraqlarda qaçırılğan ukrayinler iskencelerge oğratılğanını bildirdi. Onıñ mektübini advokat Nakolay Polozov öz Facebook saifesinde yayınladı.
"Keçken künü mahkemeden SİZO-ğa qaytır eken Melitopolli Yaroslav Juknı rastketirdim. İlk ifadelerden biri-birimizni tanıdıq. Yaroslav eyi körüne. Amma eşitme qabiliyetiniñ yaramay olğanını birden añladım. Qısmiy eşitme ğaybı insaniyetsiz iskencelerniñ neticesidir. Aqmescitte o, cenk zamanı qaçırılğan bir çoq Ukrayina vatandaşı kibi, ciddiy nezaret altında tahqiqat tevqifhanesiniñ qadınlar bölüginde tutuldı. Tahminen bir buçuq-eki ay evelsi olarnı 102-nci cezahaneniñ azabarındaki 2-nci SİZO-ğa avuştırdılar. Anda adiy hadimlerden ğayrı, qaravullıqnı mahsus quvetler askerleri de temin ete, olar ise öz nevbetinde ballarnı çekiştirmege devam ete", - dep yazıla bildirmede.
Siyasiy mabüsniñ sözlerine köre, Yaroslav Juk "anda nasıl olğanı" aqqında aytıp bermek istemegen, amma "onıñ intonatsiyasında yahşı bir şey olmağanı añlaşıldı".
"Ballar bedeniy iskencelerge ve maneviy aşalanuvğa oğratılmağa devam ete", - dep yazdı Celâl.
Juk ile beraber Herson vilâyetinden 20 yaşındaki qırımtatar Appaz Kurtametov tutula.
"Anda qaç bizim kişimiz olğanını bilmey, tahminen 100 dep tüşüne. İskencelerge ve qılınuvlarğa baqmadan Yaroslavdan bütün siyasiy mabüslerden kibi ümüt, nezaket duyula, olar azat etilecegine ve bizim ğalebemizge inana", - dep yekünledi o.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
