Qırımtatar Milliy Meclis reisiniñ birinci muavini Nariman Celâl Ukrayina prezidenti Volodımır Zelenskıynıñ Kyiv 2014 senesi işğal etilgen Qırımda Rusiye kontrolini bir vaqıt tanımaycağına dair aytqanlarınıñ müimligini qayd etti. ABD ise bunı yapa bile ve ABD lideri Donald Trump Zelenskıynıñ sözlerini «barışıq añlaşmasına zarar ketirgen» dep adlandırdı.
«Ve Ukrayina prezidentinden Qırımnı ve diger Ukrayina topraqlarını Rusiye olaraq tanımaymız degen sözlerniñ müim tekrarlavını eşitmek şahsen menim içün pek müim edi. Men bu künleri Qırımda (insanlarnen) laf ettim. Bu olar içün de müim, olar da nervalana, olar da bunı bizim ükümetimizden tekrar-tekrar eşitmege istey, akimiyetimiz bu «qırmızı sızıqtan» keçmeycegini eşitmege isteyler», – dedi Celâl Azatlıq Radiosınıñ Svoboda.Live programmasınıñ yayınında.
O, ABD ve Ukrayina arasındaki munasebetlerde peyda olğan qıyınlıqlar Ukrayina diplomatiyasınıñ ğayıp oluvı olmağanını bildirdi, çünki, onıñ fikrince, Donald Trump idaresi altındaki ABDniñ başqa memleketlernen de problemleri peyda oldı.
«Men olıp keçken şeylerni diplomatiyamıznıñ ğayıp oluvı olaraq körmeyim. Birinciden, Amerika prezidentiniñ memuriyeti bugünki halqara cemiyetteki bütün diger iştirakçilernen özüni aynı şekilde alıp barğanına esaslanam. Yani o tek Ukrayinağa yöneltilmegen. Avropa, Yaqın Şarq, Meksika, Kanada, Qıtay ve ilâhre ile (ABDniñ) munasebetleri bar», – dedi Celâl.
Onıñ qayd etkenine köre, Kyiv Ukrayinanıñ milliy menfaatlarını satmayıp, ABD ile Beyaz Saraydaki yañı memuriyetnen faal çalışmalı.
«Başqa bir şey, biz şuña esaslanmalımız, ne yazıq ki, tek deñişken ABD pozitsiyası belli bir yıqıluvlar yapsa... bu fikir bizim diplomatiyamız tarafından daima diqqat merkezine alınsın, ve bizde er sefer cevap berecek bir şey bar ve öz menfaatlarımıznı qorçalamaq içün ne yapmaq kerekmiz. Mence, şimdilik bunı yapamız», – dep ayttı Ukrayinanıñ yañı Türkiye elçisi olaraq çalışmaq içün Ankarağa ketmege azırlanğan Celâl.
«Öz menfaatımıznı diqqat merkezinde tutamız, amma añlaşmağa azır olğanını bildire ve atta bazı adımlar atamız. ABDniñ ateşkes ya da Ukrayina qazıntıları añlaşmasınen bağlı fikirler ve il. Biz muzakerelerge azır olğanımıznı, amma öz menfaatlarımızdan vazgeçmegenimizni kösteremiz. Ve bu meni raatlata», – dedi eski Kreml reinesi Celâl.
Amerika kütleviy haber vastaları, hususan The Washington Post neşiri, aytılmağan menbalarına esaslanıp, aprelniñ 23-nde Londondaki körüşüvde ABD vekilleri Ukrayina ve Avropağa Qırımnı Rusiye olaraq tanımağa ve zıddiyetni şimdiki cebede buzlatmağa teklif etecek ediler. Tış işler nazirleri iştirak etecek olğan Londondaki körüşüvni daa adiy seviyede keçirmege qarar alıd, nazirlerniñ muzakereleri içün başqa vaqıtqa qaldırıldı.
Keçken afta Parijde Ukrayina vekilleri ve avropalı ittifaqdaşlarnıñ körüşüvinden soñ ABD devlet kâtibi Marko Rubio prezident Donald Trump uzatılğan muzakerelernen bağlı sabırnı coya ve diqqatını «başqa müim meselelerge» ayıra bile, dep tenbiledi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
