Çeh Cumhuriyetiniñ baş naziri Peter Fiala qırımtatarlarğa ve Ukrayına vatandaşlarına «tarihiy adalet qaytacaq», dep söz berdi. Bu aqta o, «Qırım platformasınıñ» ekinci parlament sammiti vaqtında bildirdi.
«Avropağa istiqrar kerek. Bizim regionımızda birisi toprağımızğa kelip, onı işğal etmesine izin bermemelimiz. Qırımtatarlarğa söz bermek kerekmiz, şahsen men söz berem ve Ukrayına vatandaşlarına tarihiy adalet tiklenecek, dep vade etem», – dedi Fiala.
Onıñ qayd etkenine köre, Qırım işğali halqara uquqnı ve BM Şartnamesini boza.
«Ukrayına 1991 senesine qadar olğan toprağını qaytarğanına qadar serbest memleket olamaycaq... Qırım Ukrayınağa qarşı istilâ içün bir platforma oldı», – dedi Fiala.
Pragada oktâbrniñ 24-nde «Qırım platformasınıñ» ekinci parlament sammiti başladı. Ukrayına Yuqarı Radasınıñ spikeri Ruslan Stefançuknıñ aytqanına köre, tedbirde bütün dünyadan tahminen 70 parlament eyyeti iştirak etecek. Stefançuknıñ fikirince, Ukrayına suvereniteti ve topraq bütünligi içün «küçlü» bir yardım.
Ukrayınanıñ teşebbüsinen olğan «Qırım platforması» halqara koordinatsion mehanizm 2021 senesi avgust ayında Kyivdeki tesis sammitinde başlatıldı. Platformanıñ maqsadı – halqara kün tertibinde Qırımğa diqqatnı saqlap qalmaq, Qırımda insan aqlarını qorumaq, yarımadanıñ işğalden azat etilüvine yardım etmek ve ilâhre.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
