Çeh Cumhuriyetinde Senatnıñ Tış işler, mudafaa ve havfsızlıq komiteti 1944 senesi yapılğan sürgünlikni qırımtatar halqınıñ genotsidi olaraq tanıma qararınıñ leyhasını tasdıqladı.
Bu aqta Çehiya Tış işler naziri Yan Lipavskiy Qırımtatar Milliy Meclisi vekillerinen körüşüvde bildirdi.
«Çehiya Senatınıñ Tış işler, mudafaa ve telükesizlik komiteti 1944 senesi cinaiy sürgünlikni qırımtatar halqınıñ genotsidi olaraq tanığan Senat qararınıñ leyhasını bir ağızdan tasdıqladı. Bu qarar bu sene dekabr ayında Senatnıñ nevbetteki toplaşuvında baqılmaq kerek», – dep haber ete Qırımtatar Milliy Meclisiniñ matbuat hızmeti.
Oktâbr ayınıñ ortalarında Estoniya parlamenti 1944 senesi qırımtatar halqınıñ sovet rejimi tarafından sürgün etilmesini genotsid aktı olaraq tanığan beyanatnı tasdıqlağanını bildirdi.
Oktâbrniñ 9-nda Ukrayina Yuqarı Radası tış devletlerniñ ükümetleri ve parlamentlerini qırımtatarlarnıñ 1944 senesi Qırımdan sürgün etilmesini qırımtatar halqınıñ genotsid areketi olaraq tanımağa çağırdı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
