Ukrayınadaki cenkte qırımtatarı Seyran Kadırov vefat etti, dep bildirdi Ukrayına Devlet mülki fondunıñ yolbaşçısı Rustem Umerov.
Onıñ aytqanına köre, arbiy Ukrayına Mudafaa nazirliginiñ Baş istihbarat idaresiniñ «Qırım» mahsus bölüginde cenkleşti.
«Yaqınlarına taziyeler bildiremiz ve Qaramanğa soñsuz hatıra. Seyrannıñ ömür arqadaşı ve üç qızı qaldı. Onı ölümden soñ «Uruş ğalebeleri» medalinen taqdirlediler», – dep aytıla haberde.
Yırcı Jamala Seyran Kadırov onıñ tuvğan köyü Küçük Özenli (Maloreçenskoye) edi, dep qayd etti.
«Balalığımnıñ dostu, qorantamıznıñ dostu. Seyran Kadırov. Mudafaa nazirligi Baş istihbarat idaresiniñ «Qırım» bölügi. Balalığımda qızlarnen qayda barsaq-barayıq Seyran ve oğlan qardaşı bizni daima qoruy ediler. Ağam yoq edi, amma Seyran bar edi. Er kes biznen şaqa olmaz, dep bile edi. Kimse canımnı ağırtmay edi. Onıñ sport sevgisi, bedeni, tabiatı ve cesürligi sayesinde kimse yañlış bir şey de aytamay edi», – dep yazdı Jamala Facebookta.
Cenaze yanvarniñ 22-nde saat 12:00-de Kyivde olacaq.
Ukrayına istihbaratı, «Qırım» bölüginiñ asker sayısı daima arta, dep bildirdi – Rusiye işğal etken yarımada sakinleri qoşula.
«Qırımtatarlarnıñ tuvğan toprağı Ukrayına Qırımını Rusiye işğalci ordusından azat eteceklerniñ ilk sıralarında olacaqlarından şübhemiz yoq», – dep qayd etti Baş istihbarat idaresi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
