Canköyde Rusiye prokuraturası qırımtatar Emir Mecitovnı Rusiyeniñ missionerlik faaliyeti aqqında qanunlarnı bozmaqnen qabaatladı ve oña qarşı memuriy dava açtı. Bunıñ aqqında "Qırım birdemligi" cemaat birleşmesi haber ete.
35 yaşındaki Emir Mecitov "Qırım birdemligine", "missionerlik faaliyetini bozuv" içün Rusiye mahkemesine celpname kelgeni" aqqında aytıp berdi.
"Martnıñ 4-nde Canköy rayonınıñ Oktâbr köyüniñ camisinde cuma namazını qıla edik. Namaz vaqtında kirdiler, bizge ve ne yapqanımızğa baqtılar. Anda FVN, belki de Rusiye gvardiyası, prokuratura, polis edi, belki de FSB hadimleri edi. "Birisi qıdıramız" dediler ve dağılmamağa rica ettiler. Er keske şahsiy malümatnı bermege ayttılar. Bütün malümatnı berdik. Soñra üçümizge - maña imam olaraq ve daa ekisine şaat olaraq qalmağa ve izaatname yazmağa ayttılar. Yazdıq. Soñra meni mahkeme çağırdılar", - dedi Mecitov.
"Qırım birdemliginiñ" malümatına köre, Rusiye polisi Emir Mecitov camide "diniy teşkilâtnıñ azası ya da reberi olmadan diniy merasimler keçirigenini ve missionerlik faaliyeti içün salâhiyetlerni tasdıqlağan vesiqası olmağanını" saya.
Canköyniñ Rusiye prokuraturası Rusiye Memuriy uquq bozmalar aqqında qanunnamesiniñ 5.26 maddesiniñ 4 qısmınına binaen memuriy dava açtı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
