Kyivde «Qırım işğali: İşaretsiz, adsız, vatandaşlarnıñ arqasında saqlanıp» tedqiqatı taqdim etildi. Bu aqta Ukraina prezidentiniñ Qırım Muhtar Cumhuriyetindeki temsilciligi haber ete.
Bu tedqiqatta «canlı qalqan» qullanıluvı qayd etile – «Rusiye Ukrainanıñ Silâlı quvetleriniñ arbiy obyektlerini zapt etkende» vatandaş ealisiniñ bulunuvı.
Bundan ğayrı, Rusiye tarafından qullanılğan «yeşil adamçıqlar» (işaretsiz Rusiye arbiyleri) ve Ukraina Silâlı quvetleri arbiy bölüklerini zapt etüv vakhtında «duşmannıñ işaretlerini qanunsız» qullanuv aqqında aytıla.
Tedqiqat müellifleri Qırım işğali vaqtında bozulğan gumanitar uquq örneklerini kösterdi.
Rusiye bu malümatqa şimdilik cevap bermedi.
Qırım Muhtar Cumhuriyetiniñ prokuraturası, 2020 senesi Gaagadaki (Felemenk) Halqara ceza mahkemesiniñ prokurorı 2014 senesi Qırımnıñ Rusiye tarafından işğal etilüvi davasınıñ resmiy tahqiqatını başlar, dep bekley.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
