Rusiye kontrolindeki Canköy rayon mahkemesi aq qorçalayıcı Lutfiye Zudiyevanıñ Rusiye prokuraturasınıñ tenbi vesiqasını qanunsız qabul etüv davasını qanaatlendirmege razı olmadı. Bu aqta «Qırım birdemligi» cemaat birleşmesi bildire.
«Bu qararnıñ siyasiy sebepleri bar, çünki Rusiye FSBsiniñ hadimleri kirişkeninden berli o adaletli mahkeme printsiplerine uymay», – dep izaatladı Zudiyeva.
Onıñ aytqanına köre, Rusiye prokuraturası onıñ şahsiy malümatı olğan Rusiye FSBsiniñ vesiqasına esaslana. Bundan ğayrı, mahkemede Zudiyeda «Qırım birdemliginiñ» faali ola, «qanunsız tedbirlerniñ» yayınlanmasını teşkil etip, olarda iştirak ete ve qol tuta bile, dep aytıldı.
Rusiye kontrolindeki Canköy rayon mahkemesi aq qorçalayıcı Lutfiye Zudiyevanıñ Rusiye politsiyasından alğan tenbi vesiqasını qanunsız tanımaq davasını qanaatlendirmedi.
Zudiyevanıñ tarif etkenine köre, 2020 senesi mayısnıñ 1-nde oña eki tenbi vesiqası berildi – bir danesi politsiyadan, ekincisi – prokuraturadan. Onıñ aytqanına köre, eki vesiqada da uquq qoruyıcı organları Zudiyevanıñ angi areketlerini qanunsız sayğanına dair bir malümat yoq.
Hatırlatamız, işğal altındaki Qırımda tahminen 60 kişi ihtar aldı. Olarnıñ arasında – advokat, aq qorçalayıcı, bir kişilik narazılıq aktsiyalarınıñ iştirakçileri, Qırımtatar Milliy Meclisiniñ azaları, «Qırım birdemliginiñ» faalleri.
Advokat Edem Semedlâyevniñ bildirgenine köre, Rusiye uquq qoruyıcılarınıñ «ekstremist faaliyeti qabul etilmeycegine» dair ihtarları basqı ve qorquzuv aleti ola.
