Rusiye quvetçileri Canköyde Dilâver İbraimovnıñ evini tintti, onı ise belli olmağan yerge alıp ketti. Bu aqta advokat Emil Kurbedinovğa tutulğannıñ tuvğanları bildirdi, dep haber ete «Qırım birdemligi» cemaat birleşmesi.
«Bugün Canköyde keçirilgen tintüvden soñ 3.02.1994 senesi doğğan İbraimov Dilâver Tairoviç tutuldı. Tuvğanlarınıñ aytqanına köre, Dilâver evde bir özü edi. Oğlannıñ ana-babası bugün bir yerge ketti ve apayı evde yoq edi. Tintüvden soñ ömür arqadaşı evge kirip olamay, çünki Dilâverden ğayrı, kimseniñ anahtarı yoq. Mennen tuvğanları bağlandı. Şimdi politsiyağa insan hırsızlanuvına dair ariza bermek içün sıcaq ağlarğa telefon etecekler. Onı tapıp olamaylar. İç işler nazirligi ve Federal telükesizlik hızmetine barğanlar. Qayda olğanını kimse aytmay», – dedi Kurbedinov.
Faallerniñ aytqanına köre, evde tintüv keçirilgenini qomşular haber etti, olar saba saat yedilerde evden avtozak ve eki beyaz mikroavtobus areket etkenini kördi.
Rusiye quvet qurulışları vaziyetni şimdilik izaatlamadı.
2014 baarinde işğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette tintüvler ötkere.
