Canköyde yañı mustaqil qırımtatar teatriniñ «Altın beşik» spektakliniñ dekabrniñ 8-nde olacaq premyerası lâğu etildi.
Teatrniñ bediiy reberi Bilâl Bilâlovnıñ Qırım.Aqiqat mühbirine bildirgenine köre, yerli medeniyet evi sana ayırmaqtan vazgeçti.
«Başta spektakl şeadetnamesini bermek kerek dediler, o yoq. Soñra medeniyet nazirliginden izin talap ettiler. Bizler – nazirliknen iç bir alâqası olmağan mustaqil teatrmiz. Olmaycaq şey. Bizni sanağa kirsetmemek içün çeşit türlü manaçıqlar uyduralar», – dedi Bilâl Bilâlov.
Teatr müdiri bu adiseni yañı teatrniñ faaliyetini toqtatmaq maqsadınen yapılğan basqı olaraq tanıy.
«Rayon ve medeniyet evleriniñ reberleri «yuqarıdan» emir alalar. Olar Balbekten (Rusiye Devlet dumasınıñ Qırım deputatı – QA) kelgenini ögrendik. Onıñ emri ile bu şaraitlerde bile çalışmağa imkânımız olmasın dep, er şey yapıla. Onıñ tarafından bu çirkinlik devam ete», – dedi rejissör.
Rusiye Devlet dumasınıñ qırımlı deputatı Ruslan Balbek bunı daa izaatlamadı. Canköy medeniyet eviniñ reberligi tarafından da bir tefsir yoq.
«Beş daqqa nefes» spektaklini truppa bir qaç ay azırladı. Bilâlovnıñ aytqanına köre, aman-aman bütün biletler satıldı. O, seyircilerden afu sorap, eñ yaqın vaqıtta spektakl köstermek içün elinden kelgenini yapmağa vade etti.
Qırımtatar muzıkalı-drama teatriniñ sabıq müdiri ve bediiy reberi Bilâl Bilâlov Qırım.Aqiqatqa bildirgenine köre, mustaqil teatrniñ temelinde reberinden soñ Qırımtatar teatrinden ayırılğan 20 qırımtatar oyuncısı tura.
Avgustnıñ 7-nde Qırımnıñ Rusiye akimiyeti Qırımtatar muzıkalı-drama teatriniñ bediiy reberi ve rejissöri, Ukrainada nam qazanğan sanat erbabı Bilâl Bilâlovnı işten boşattı. Rejissörniñ fikirince, onı uydurılğan sebep boyunca işten boşattılar.
Teatr hadimleri reberine qoltuttı. Onıñ tarafını Qırımtatar Milliy Meclisiniñ reisi Refat Çubarov da tuttı.
Sentâbr ayınıñ başında Kreml kontrolindeki Aqmescitniñ Merkeziy rayon mahkemesi Bilâlovnıñ davasını baqmağa başladı. O, Qırımnıñ Rusiye akimiyeti tarafından işten boşatılmasına itiraz bildire.
Qırımnıñ Rusiye akimiyeti teatrniñ yañı müdiri olaraq Mecede Melgaziyevanı tayin etti. Onıñ reberligi altında teatr sentâbrniñ 6-nda mevsimni yañı programma ile açtı.
Bilâlov 1989 senesinden berli Qırımtatar akademik muzıkalı-drama teatrinde çalışqan edi, 1994 senesi onıñ bediiy reberi-müdiri oldı.
