Rusiye kontrolindeki Canköy rayon mahkemesi salı künü, iyülniñ 14-nde, aq qorçalayıcı Lutfiye Zudiyevanıñ Rusiye politsiyasından kelgen tenbilerniñ qanunsız tanılmasına dair memuriy davası boyunca oturışuvnı kene başqa künge avuştırdı. Bu aqta «Qırım birdemligi» cemaat birleşmesi haber etti.
«Oturışuvda Canköy rayonlarar prokuraturasınıñ vekili iştirak etti, o, Qırım Cumhuriyeti Prokuraturasınıñ vekilini cevapkârdaş olaraq celp etmege muracaat etken edi. Mahkeme bu meseleni muzakerege çıqarıp, esnas iştirakçilerinden soradı. Advokat (Nazim – QA) Şeyhmambetov qarşı çıqmayıp, bu böyle ihtarlarnıñ sebeplerini ögrenmege yardım eter, dedi», – dep aytıla haberde.
Qayd etilgenine köre, Zudiyevanıñ davası boyunca nevbetteki oturışuv iyülniñ 23-ne belgilendi.
Daa evel dava oturışuvı cevapkâr – Qırımnıñ Rusiye İç işler nazirliginiñ vekili – esnasqa kelmegeni içün başqa künge avuştırılğan edi.
Hatırlatamız, işğal altındaki Qırımda tahminen 60 kişi ihtar aldı. Olarnıñ arasında – advokat, aq qorçalayıcı, bir kişilik narazılıq aktsiyalarınıñ iştirakçileri, Qırımtatar Milliy Meclisiniñ azaları, «Qırım birdemliginiñ» faalleri.
Advokat Edem Semedlâyevniñ bildirgenine köre, Rusiye uquq qoruyıcılarınıñ «ekstremist faaliyeti qabul etilmeycegine» dair ihtarları basqı ve qorquzuv aleti ola.
