Moskvanıñ "Çetel agentleri» olaraq belgilengen "Qırım birdemligi" areketinen bağı olğanı idda etilgen 137 şahıstan ibaret cedvelde areketniñ faaliyetine iç bir şekilde qoşulmağan Canköylü kör faal de bar. Bu aqta adını aytmamaq şartınen "Qırım.Aqiqat"qa Qırımlı aq qorçalayıcı haber etti.
Söz Canköylü birinci gruppa saqatı İgor Nikitenko aqqındadır.
"İgorniñ aytqanına köre, onıñ iç bir teşkilâtnen — siyasiy ya da diniy — iç bir türlü bağı yoq. O, atta körler cemiyetiniñ azası degil. Onıñ çetel agentleri cedveline kirsetilmesiniñ esası belli degil. İgor endi Rusiyeniñ Adliye nazirligine ariza berdi", — dep añlattı aq qoruyıcı.
Bu malümatnı qırımtatar halqı Meclisiniñ başı Refat Çubarov da tasdiqlap, adlar cedvelini yayınladı.
Adını gizlegen aq qoruyıcı, Nikitenkoğa bir buçuq yıl devamında havfsızlıq küçleri toqunmağanını, amma o, elektriksiz qalğan Qırımnıñ şimalindeki sakinlerniñ problemleri aqqında haberler yapıp başlağanınen, yerli polis hadimleri deral teşkermek içün keldi, dep bildirdi.
"Bu keñ cedvelge çoqtan berli içtimaiy ağlardaki bütün esaplarını yoq etip, bir yerde bir şey paylaşmağan insan aqları faali Abdureşit Cepparov da kirgeni meraqlıdır", — dep, haber etti aq qoruyıcı.
Qırımdaki Rusiye akimiyeti vaziyet aqqında iç bir şey aytmadı.