Dekabrniñ 10-dan başlap Rusiye akimiyeti cankoyli kör faal İgor Nikitenkonıñ evinde elektrik energiyasını kestirdi. Bu aqta adı aytılmaycaq şartınen yerli aq qorçalayıcı Qırım.Aqiqatqa bildirdi.
Onıñ fikirince, faalge vatandaş faaliyetinden vazgeçmesi içün basqı yapalar.
«Dekabrniñ 10-nda Nikitenkonıñ dairesinde elektrik energiyası kesildi. Aileniñ elektrik energiyası içün borcu yoq. RESke ariza bergenler, amma netice yoq. Nikitenko «Krımenergonıñ» «canlı yardımına» bir qaç kere telefon etti, anda ricalar qaldırdı, kimse cevap bermedi. Elektrik olmasa, qazan çalışmay, ev qızdırılmay, buzdolabı çalışmay, anda faalniñ ayatı içün müim olğan ilâcı – insulin saqlana. Böyleliknen faalni vatandaşlıq faaliyetinden vazgeçmege mecbur etmek içün basqı yapıla, dep tüşünmege sebep bar», – dedi aq qorçalayıcı.
Qırım.Aqiqatqa haber etkenine köre, Rusiye uquq qoruyıcıları faalden alğan cep telefonı ve bilgisayarı daa qaytarılmadı.
Moskvadan kelgen faal Oksana Osadçaya faal İgor Nikitenkonıñ cöremesini tölemek içün para toplağanını ilân etti.
«Dekabrniñ 10-nda İgorge «pamuqlı cemaat» ibaresi olğan video içün «Nefret ya da duşmanlıq qozğamaq» 20.3.1 memuriy maddesine istinaden 10 biñ ruble cöreme berildi. Ve dekabrniñ 10-ndan başlap 60 kün sayıla, bu müddet içinde bu para cezasını tölemek kerek», – dep yazdı faal «VKontakte» paylaşuvında.
Oktâbrniñ 30-nda Rusiye Federatsiyası tarafından işğal etilgen Qırımda Rusiye uquq qoruyıcıları cankoyli kör faal İgor Nikitenkonı tuttı. Maneviy basqı ve köteknen yaqaladılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
