Canköydeki patlavlar sebebinden Qara deñizde Rusiyeniñ «Kalibr» qanatlı raketalarınıñ sıñırlı yedegi bar. Bu aqta Ukrayına cenübiniñ Mudafaa küçleriniñ matbuat kâtibi Natalâ Ğumenük Ukrayına umummilliy telemarafonı yayınında ayttı.
Onıñ bildirgenine köre, Rusiye ordusı Qırımğa raketalarnı taşığan demiryol hatları daa ğayrıdan tiklenmedi, şunıñ içün naqliyat aviatsiyası yardımınen olarnı alıp ketmege tırışalar.
«Furtuna tınğan soñ bile gemi sayısı arttı. Şimdi Qara deñizde 10 dane bar, amma tek bir raketa taşıyıcısı mevcut – suvaltı. Bazı kalibrlerniñ yedekleri kene de bar», – dedi Ğumenük.
Martnıñ 20-nde aqşam Canköyde işğal etilgen Qırımnıñ şimalinde atış ve küçlü patlavlar oldı.
Rusiye kontrolindeki Qırım yolbaşçısı Sergey Aksenov Canköydeki patlavlarnı izaatlap, Rusiye ava mudafaa sistemasınıñ işi aqqında bildirdi. Bundan ğayrı, Aksenovnıñ aytqanına köre, patlavlar neticesinde bir kişi yaralandı, parçalar ev ve tükânğa zarar ketirdi.
Ukrayına mudafaa nazirliginiñ Baş istihbarat idaresi martnıñ 20-nde Canköydeki patlavlar neticesinde «Kalibr NK» Rusiye qanatlı raketaları yoq etildi, dep bildirdi. ASTRA mustaqil Rusiye jurnalistleriniñ leyhası Canköyde lokomotiv deposı, vokzal qaravulınıñ binası, mal-malzeme ve yaqarlıq anbarları zarar kördi, dep bildirdi.
Rusiye akimiyeti ve devlet kütleviy haber vastaları naqliyat infrastrukturası zarar körgenini inkâr etip, tek vatandaş obyektleri zarar kördi, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
