"Aprelniñ 30-nda gece ballistik raketalar (ihtimalnen, MGM-140 ATACMS) Cenübiy arbiy okrugınıñ 4-nci ava quvetleri ve ava mudafaası komandanlığınıñ vertolöt polkunıñ yerleşken yeri olğan Canköy arbiy uçaq alanına ücüm etti", — dep bildire ASTRA kanalı. Ücüm neticesinde 5 arbiy adam yaralandı, dep haber etile.
Oquyıcılar Canköyniñ arbiy ava limanında olğan yanğın aqqında da haber ettiler.
Rusiye telegram kanalları ve memurları ilhaq etilgen Qırımda gece patlavlar ve ava mudafaasınıñ çalışqanını eşitkenlerini bildirdiler.
Meselâ, "Krımskiy veter" "Qırımda gürültülü gece" aqqında yazdı. Onıñ malümatına köre, yerli sakinler patlavlarnı Kezlev, Canköy, Aqmescit, Sarabuz ve Krasnoperekop rayonlarında eşitkenler. "Nikolayevskiy Vanyok" telegram kanalı Cnköy ve Sarabuz rayonındaki ücümni tasdıqladı.
Qırımnıñ Rusiye yolbaşçısınıñ mesleatçısı Oleg Kırıçkov "Ava mudafaası sistemalarınıñ işini çıqarmamağa ve köstermemege" çağırdı. Zaporijjâ vilâyetindeki işğalci memuriyetiniñ vekili Rogov, Canköy ve Aqmescit üzerinde "Rusiyeniñ ava mudafaası sisteması çalışqanını" ve yarımada ATACMS raketaları ile ücüm etilgenini bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
