Canköyde ve Canköy rayonında oktâbrniñ 31-nde aqşam patlavlar eşitildi, dep yaza Qırımdaki Telegram kanalları.
Şeerde eşitilgen üç patlav aqqında «Krımskiy veter» Telegram kanalı yerli sakinlerniñ malümatına esaslanıp yazdı. «ÇP Severnıy Krım» Telegram kanalı Canköy rayonındaki patlavlar aqqında haber etti, Rusiye ava mudafaasınıñ işi aqqında aytıldı. Bundan ğayrı, Rusiye monitoring Telegram kanalları Qırımda uçucısızlarnıñ telükesi aqqında yaza.
Şimdiki vaqıtta başqa menbalarda bu malümatnı teşkermek mümkün degil. Rusiye akimiyeti bu haberlerni daa izaatlamadı.
Rusiye Mudafaa nazirligi Qırımğa bir dronnıñ ücümi aqqında bildirdi. Müessise malümatına köre, dron urıp tüşürilgen, amma isbatlar daa yoq. Rusiye Mudafaa nazirliginiñ beyanatlarını mustaqil şekilde teşkermek daa mümkün degil. Agentlik anane olaraq ücümde Ukrayinanı qabaatlay, Ukrayina arbiyleri vaziyetni şimdilik izaatlamadı.
Bundan evel yerli Telegram kanalları Qırımda oktâbrniñ 24 gecesi patlavlar eşitildi, dep bildirgen edi. Soñra Astra Telegram kanalı ücüm neticesinde Rusiye askerleriniñ mobil radar stantsiyasına zarar ketirildi, dep haber etti.
Qırım.Aqiqatnıñ malümatına köre, Canköy yaqınlarında arbiy uçaq alanı bar, anda Arbiy ava quvetleriniñ 4-ünci komandanlığınıñ 27-nci qarışıq aviatsiya diviziyasınıñ 39-ncı vertolöt polku, Cenübiy arbiy okrugınıñ ava mudafaası, Mi-8, Mi-35M, Mi-28, Ka-52 içün üç aviatsiya eskadrilyası bar. Rusiye FSB sıñır hızmetiniñ vertolötları da yerleşe.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
