Dekabrniñ 29-nda Canköyde patlav sesleri eşitilgen. Yerli telegram kanalları ava mudafaası işlegenini bildire.
"Canköylüler, sakin oluñız! Ava mudafaası çalışa", - dep yaza "Tipiçnıy Canköy".
Patlav seslerini diger telegram kanalları da tasdıqlay.
"Canköy üzerinde kökte bir şey urıp tüşüreler. Taqipçilerimiz haber etkeni kibi, 3-4 patlav olğan, şeer civarında tuman köterilmekte", - dep yaza "Krımskiy veter".
Al-azırda Qırımnıñ rusiye akimiyeti tarafından resmiy izaat yoq. Ukrayina arbiyleri ve resmiyleri de şimdilik bir şey aytmay.
Canköyde Rusiye arbiy uçaq alanı bulunmaqta. Evel Ukrayina Silâlı quvetleriniñ Baş ştabında haber etkenleri kibi, o yerden RF ordusınıñ, silâ ve tehnikanıñ avuşması kerçekleşmekte.
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
