İşğal etilgen Qırımda Canköy rayonınıñ elektrik ast stantsiyasına darbe endirildi, dep haber etile, bunıñ neticesinde dört memuriy rayon elektriksiz qaldı.
"Krımskiy veter" telegram kanalı menbalarına esaslanıp, saat 17:30-larda "Qırımdaki elektrik ast stantsiyasına ücüm" aqqında bildirdi. "Krımskiy veter" darbe Canköy rayonındaki "Ostrovskaya" 330 kV elektrik ast stantsiyasına endirildi, dep qayd etti.
Saat 17:37-de "Krımenergo" dört rayonda elektrikler söndürilecek, dep tenbiledi: Canköy, Qurman, Aqşeyh ve Curçı. Qırımnıñ energetik şirketi elektrik energiyasınıñ olmamasınıñ sebebi olaraq "hatlardaki tehnologik qazalar" ola ve "eki saat içinde elektrikler tolusınen ğayrıdan tiklenecek", dep söz berdi. Al-azırda elektrik energiyasınıñ ğayrıdan tiklengeni aqqında haber etilmey.
Rusiye Federatsiyasınıñ Mudafaa nazirligi Qırımda ve Azaq deñizde ukrayin uçucısızları urıp tüşürildi, dep esabat berdi.
"Saat 16.00-dan saat 20.00-ge qadar ava mudafaasınıñ nevbetçi vastaları doquz ukrayin uçucısız cihazını yoq etti: yedi uçucısız – Qırım Cumhuriyetinde, eki uçucısız – Azaq deñizinde", – dep yazıldı Rusiye müessisesiniñ telegram kanalında.
Tüşürilmegen uçucısızlarnıñ sayısı aytılmay.
Ukrayina arbiyleri işğal etilgen Qırımdaki obyektlerge ücüm haberini izaatlamadı.
2022 senesinden berli Qırım yarımadası aman-aman er kün uçucısız ve raketalarnıñ ücümlerine oğray, çoqusı allarda bu malümat tasdıqlansa bile, Rusiye Mudafaa nazirligi ya da Rusiye akimiyeti arbiy obyektlerge darbe endirilgenini inkâr ete.
