Qırımnıñ şimalinde Canköy sakinleri oktâbrniñ 10-nda aqşam patlav seslerini eşitti. Bu aqta «VKontakte» içtimaiy ağı ve Qırım Telegram kanalları bildirdi.
«Mı iz Cankoya» gruppasında şeer sakinleri olıp keçken adiseniñ bir qaç versiyasını ayttı: Rusiye ava mudafaasınıñ işi, raketa darbesi ya da mustaqil evde olğan fevqulâde adise. «Mı iz Cankoya» abunecileri patlav Canköyniñ 8-inci mektebi rayonında oldı, dep bildire.
«Yevpatoriya | Canköy | Feodosiya» Telegram kanalı abunecileriniñ malümatına esaslanıp yazdı: «Canköyde bir şey patladı! Ava mudafaası çalışqandır».
«Krımskiy veter» Telegram kanalınıñ malümatına köre, patlav Canköyde Sadovaya soq., 183 (№8 mektebi yanında) adresinde oldı. Kanalnıñ menbalarına esaslanıp haber etkenine köre, patlavdan soñ evge kirgen parçadan qızçıq yaralandı. «Rusiye ava mudafaası belli olmağan nişanğa ateş açtı, evge tüşti degen malümat bar», – dep yazdı «Krımskiy veter».
Canköyde Rusiye qullanğan arbiy uçaq alanı buluna.
Canköyniñ Rusiye akimiyeti vaziyetni daa izaatlamadı.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına qarşı» ateş ve «ava mudafaasınıñ işi» dep añlata. Aqyardaki patlavlar haberlerinden soñ Aqyarda sığınaqlar teşkerilip başlandı.
Avgustnıñ 9-nda Saq rayonınıñ Novofedirivka qasabasınıñ arbiy uçaq alanında patlavlar oldı. Rusiye akimiyeti «yaqın evlerden» tahminen 30 kişi tahliye etildi, dep bildirdi. 60-tan çoq mesken ev zarar kördi.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Sentâbrniñ 7-nde Ukrayına Silâlı quvetleriniñ baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine qarşı Ukrayına arbiyleriniñ raketa darbelerini tanıdı. Ukrayına mudafaa nazirligi qırımlılarnı Qırımdaki Rusiye ordularınıñ yerlerini «eVoroğ» çat-botuna bildirmege çağırdı.
The New York Times neşiri Ukrayına memurınıñ malümatına esaslanıp, Qırımdaki patlavlar «elit Ukrayına arbiy bölügi» yardımınen kerçekleştirildi, dep bildirdi. Memur gizli qalmaq şartınen laf etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
