Rusiye Federatsiyası işğal etken Qırımda salı künü, iyünniñ 2-nde, Canköy demiryol stantsiyası mahsus ilânğa qadar yolcularnıñ alıp tüşürmesi içün vaqtınca qapatıldı. Trenler şeer etrafından deñiştirilgen yoldan kete, dep haber ete Qırım demiryolu.
Canköyde minmege planlaştırğan yolcularğa stantsiyağa bilette olğan vaqıttan bir buçuq saat evelsi kelmege tevsiye etile – anddan Urojaynaya stantsiyasına qadar avtobuslar qatnay. Olar tren yolğa çıqmazdan evel özleri de 30 daqqa evelsi Urojaynaya stantsiyasına kele bile. Canköyge ketken yolcularnı Urojaynaya stantsiyasına qadar ketirip, andan avtobuslarğa mindireler.
Moskva vaqtınen saat 8:00-ge qadar dört "Tavriya" treni keç qala. İyünniñ 1-nde çıqacaq olğan №078 Simferopol – Sankt-Peterburg treni Canköy – Sankt-Peterburg yerinde lâğu etildi. Yolcularğa bilet parasını qaytarmağa ya da №174 Kezlev – Moskva trenine minmege teklif etile. Şirket bildirgenine köre, keç qalğan yolcularğa suv ve aş berile.
Bundan ğayrı, Qırımda "tehnik sebeplerden" Canköy – Ermeni Bazar, Canköy – Solenoye Özero, Canköy – Azovskaya ve Canköy – Urojaynaya şeer trenleriniñ areketi vaqtınca toqtatıldı.
Cedveldeki deñişmeler ve stantsiyalarnıñ qapatıluvı yerli sakinler ve pabliklerniñ Canköyde gece olğan patlavlar haberlerinden soñ oldı, demiryol vokzalında saba "sapörlar çalıştı".
"Krımskiy veter" Telegram kanalı menbalarına esaslanıp haber etkenine köre, "arbiy eşelon darbege oğradı, bu saat 23.00-da oldı", tasdıqlanmağan malümatqa köre, "cam parçalarından demiryolunda turğan yolcu treni zarar kördi". Cedvelge köre, "Aqmescit – Sankt-Peterburg" treniniñ anda bulunması mümkün edi.
Rusiye Mudafaa nazirligi Qırım ve Qara ve Azaq deñizlerinde gece ücümi vaqtında 148 ukrayin uçucısızı tutuldı, dep esabat berdi.
Muarririyet bu malümatnı resmiy şekilde tasdıqlap olamay.