Qırımda Canköyde olğan patlavlardan soñ arbiy uçaq alanında yanğın çıqtı, dep haber ete Telegram kanalları yerli sakinlerniñ malümatına esaslanıp.
Yarımadanıñ Rusiye akimiyetinden resmiy malümat şimdilik yoq.
Keriç köpründe maşina areketi toqtatıldı, sebebi belli degil. Bir saattan soñ areket kene başlatıldı.
Yerli sakinlerniñ malümatına köre, patlavlar ava telükesi ilân etilmezden evel oldı.
«Qalayda (Azovskoye) pek yahşı eşitildi. Uçaq alanı da Canköyden cenüpte yerleşe. Patlavlar gece saat 3:30-larda başladı. Farqlı küçlü ondan çoq patlav eşittim. Bazıları pek küçlü edi, ev camları titredi», – dep bildirdi «Suspilne» cemaat yayınlayıcısına yerli sakin.
Daa soñra Qırımnıñ Rusiye ükümeti naqliyat naziri Nikolay Lukaşenko Canköyden Tarhanlarğa (Pobednoye) qadar maşina yolu qapatıldı, dep bildirdi.
Qırım.Aqiqatnıñ malümatına köre, aviabazada Arbiy ava quvetleriniñ 4-ünci komandanlığı 27-nci qarışıq aviatsion diviziyasınıñ 39-ıncı vertolöt polku ve Cenübiy arbiy okrugınıñ ava mudafaası, Mi-8, Mi-35m, Mi-28, Ka-52 içün üç aviatsion eskadrilya bar. Rusiye Federatsiyası FSB sıñır hızmetiniñ vertolötları da anda buluna.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
