Rusiye FSBsi tahqiqat bitirip, Hizb ut-Tahrir «ekinci Canköy gruppasınıñ» qırımtatarlarını qabaatladı, dep haber ete «Qırım birdemligi».
İyül ayında Osman Abdurazakov, Leman Zekerâyev, Halil Mambetov, Refat Seydametov, Ekrem Kroş ve Ayder Asanov Qırımdaki tahqiqat izolâtorından Rostov-na-Donuğa etap etile, dep bildire advokat Aleksey Ladin.
Bu afta imaye cinaiy dava malümatlarını ögrenip başlaycaq, bundan soñ qabaatlav qararı prokuraturağa berilecek. «Eki-üç afta, belki, daa çoq ögrenecekler», – dep tarif etti advokat.
Soñra «ekinci Canköy gruppasınıñ» davası Cenübiy okrugınıñ arbiy mahkemesine berilecek, qırımtatarlarnı ise Qırımdan Rostov-na-Donu tahqiqat izolâtorına etap etecekler, dep qayd ete «Qırım birdemligi».
Advokat Emil Kurbedinov qırımlı siyasiy mabüslerniñ yarımadadan etap etilüvini qanunsız dep saya. «Ukrayına vatandaşlarınıñ Rusiyege avuştırıluvı – gumanitar uquq, Jeneva şartnamesi, PACE qararı ve halqara uquqnıñ bozuluvıdır. Bu arbiy cinayet dep sayıla», – dep izaatladı advokat.
Yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
