Gece küçlü yel Canköydeki mektep damını qoparıp alıp ketti. Bu aqta işğal etilgen Qırımnıñ acele ve qurtaruv hızmetleri bildire.
«Gece küçlü ruzgâr Canköy şeerindeki №7 mektepniñ damını qoparıp alıp ketti, onıñ büyükligi 840 metr kâre edi, kimse zarar körmedi», – dep bildirdi yarımadanıñ acele hızmeti TASS Rusiye agentligine. Qırımdaki Rusiye Fevqulâde vaziyetler nazirligi de bu malümatnı yerli kütleviy haber vastalarına tasdıqladı.
Rusiye kontrolindeki Canköy memuriyetiniñ yolbaşçısı Eduard Selivanov akimiyetke qoltutqan «Krıminform» saytına bildirdi ki, qaza sebebinden mektepte dersler lâğu etildi.
«İlk evelâ tüşkenlerni baqacaqmız. Bugün mektepte tatil ilân etildi, bazarertesi kününden itibaren dersler olacaq. Soñra tamir işleri yapılacaq, şimdi çalışamız», – dep ayttı o.
Qırımdaki Fevqulâde vaziyetler nazirligi ve Canköy memuriyetiniñ saytlarında bu malümat şimdilik yoq.
Qırımlı qurtarıcılar yarımadada ava bozulacaq, dep tenbilegen edi. Daa evel Qırımda noyabrniñ 22-ne qadar yel quvetleşkeninden furtuna havfı ilân etilgen edi. Qırımlılar dekabrniñ 1-nden itibaren yollarda areket sıñırlanacaq, dep ihtar etildi.
