Canköyde Qırımdaki Rusiye FSBsiniñ sıñır idaresi hadimleri Qırımdan çıqmağa tırışqan ve Rusiyede qıdırılğan qırımlını yaqaladı, dep bildire idareniñ matbuat hızmeti.
«1965 senesi doğma Rusiye vatandaşı yaqalandı, 2018 senesi dekabr ayında onı federal seviyede qıdırmağa başladılar. Berilgen vesiqalarnı teşkergen sıñırcılar 53 yaşında qırımlını uquq qoruyıcılar qıdırğanını añladı», – dep aytıla haberde.
Matbuat hızmeti qayd etkenine koyer, erkek kişiniñ çıqması yasaq etilgen edi. Tahqiqat onı Rusiye Ceza kodeksiniñ 158-inci maddesiniñ 3-ünci qısmınıñ «g» noqtasına istinaden (bank esabından yapılğan hırsızlıq) cinayet işlegeninden şübheli saymaqta. Yaqalanğan kişi yarımadanıñ Rusiye politsiyasına teslim etildi. Adı aydınlatılmay.
Bundan evel Qırımdaki Rusiye FSBsiniñ idare hadimleri işğal etilgen Qırımğa «pasportsız» kirmege tırışqan Ukraina ve Rusiye vatandaşları tutuldı, dep bildirgen edi.
Ukraina Devlet sıñır hızmeti Qırımnıñ memuriy sıñırında FSB tarafından yaqalanğanlarnıñ kimligini belgilemege imkânsız olğanını bir qaç kere qayd etken edi. Rusiye tarafı olarnıñ şahsiy malümatını aydınlatmay. Ukraina sıñırcıları, «işğalcilernen bağ tutmaylar», dep bildireler.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
