«Canköy» Rusiye keçiş noqtasında martnıñ 14-nde avto naqliyatınıñ areketi vaqtınca sıñırlandı. Bu aqta Rusiye kontrolindeki Qırım gümrükhanesiniñ matbuat hızmeti bildire.
Berilgen malümatqa köre, sıñırlar saat 12:00-den 15:00-ke qadar server donatmalarınıñ tehnik baquvı sebebinden devam etecek.
«Bu vaqıt devamında YEAES malları, şahsiy qullanuv naqliyat vastaları, halqara taşımalar kerçekleştirgen naqliyat vastalarınıñ keçmesinen bağlı gümrük tedbirleri yapılmaycaq», – dep aytıla haberde.
Vatandaşlar ise adiy rejimde keçirilecek.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
