Bazarertesi künü, fevralniñ 1-nde, «Qırım birdemliginiñ» faali Nadir Aliyev, cemaat imayecisi Ayder Suleymanov ve birleşmeniñ mühbiri Ablâmit Ziyadinovğa Canköy rayonında Rusiye quvetçileri keldi.
Bu aqta «Qırım birdemligi» Qırım.Aqiqatqa bildirdi.
«Maalle polisi al-azırda er yerde mitingler keçe, dep ayttı. Aleksey Navalnıynı (Rusiyeli muhalifet – QA) qorçalav aktsiyaları aqqında aytıla. Ve o, men anda iştirak etmeyim dep tenbilemege kelgen eken. Olarğa profilaktika subetini keçirmege vazife berildi. Menden tanış olıp imzalamağa rica ettiler», – dep izaatladı Nadir Aliyev.
Ayder Suleymanovnıñ bildirgenine köre, o, politsiyanıñ areketlerini qanunsız dep saya.
«Evime eki hadim keldi, birisi – bizim maalle polisimiz. Evde yoq edim, babam çıqtı. Rusiye Federatsiyası Memuriy bozuv kodeksiniñ 20.2 maddesine istinaden bir kere bile çekilgen er kesnen profilaktika subetleri keçirile, dep aytqanlar. Qomşum Nadir Aliyevge de kelgenler, soñra Ermeni Barın (Mnogovodnoye – QA) köyüne mühbir Ablâmit Ziyadinovğa ketkenler. Babama telefon nomeralarını qaldırıp, telefon etmemni rica etkenler. Men kimsege telefon etmeycem, çünki bir şey yapmadım. Olarnıñ ziyaretini ise bizni qorquzuv ıntıluvı dep sayam», – dep ayttı imayeci.
Yanvarniñ 30-nda Qırımda üç qırımtatarı Rustem Mennanov, Asan Seythalilov ve Eldar Seyt-Eminov «qanun bozulmaycaq» dep tenbilendi.
Bundan evel polis Eski Qırımdaki qırımtatar faallerini tenbiledi – Aziz Karahalilov ve Arsen Yakubovnı. Mustafa Seydaliyevge de kelgenler – «Qırım birdemliginiñ» koordinatorına.
Hatırlatamız, 2020 senesi dekabr ayında da polis Qırımdaki qırımtatar faalleriniñ evine kelgen edi.
Qırımnıñ farqlı rayonlarında apiske alınğan ve mahküm etilgen qırımlılarnıñ soy-sopları, faaller, vatandaş jurnalistleri ve din adamları polis ziyaretleri aqqında bildirgen edi. «Qırım birdemligi» olarnıñ aq qorçalayıcı ofisine 20-den çoq insan muracaat etti, dep bildirdi.
