Rusiye kontrolindeki Canköy rayon mahkemesi aq qorçalayıcı Lutfiye Zudiyevanıñ Rusiye politsiyası bergen ihtarlarnıñ qanunsız tanılmasına dair davanı qanaatlendirmedi. Bu aqta «Qırım birdemligi» bildire.
Advokat Nazim Şeyhmambetov bu qararnı qanunsız sayıp, mahkeme qararını istinaf mahkemesinde şikâyet etmege niyetlene.
«Mahkeme qanunsız bir qarar çıqardı, dep tüşünemiz. Mahkeme oturışuvı vaqtında ise İç işler nazirliginiñ vekili şikâyet etilgen ihtarda olğan malümatnıñ delili yoq, dep bildirdi. Mahkeme oturışuvında bergen bir çoq sualimiz ve davacınıñ suallerine İç işler nazirliginiñ vekili Zudiyeva Lutfiye bir de bir qanunsız miting, silâ, yasaqlanğan timsaller qullanılacaq qanunsız aktsiyalarnı keçirecegine dair malümatları yoq, dep cevap berdi», – dep tarif etti advokat.
Zudiyevanıñ tarif etkenine köre, 2020 senesi mayısnıñ 1-nde oña eki tenbi vesiqası berildi – bir danesi politsiyadan, ekincisi – prokuraturadan. Onıñ aytqanına köre, eki vesiqada da uquq qoruyıcı organları Zudiyevanıñ angi areketlerini qanunsız sayğanına dair bir malümat yoq.
Hatırlatamız, işğal altındaki Qırımda tahminen 60 kişi ihtar aldı. Olarnıñ arasında – advokat, aq qorçalayıcı, bir kişilik narazılıq aktsiyalarınıñ iştirakçileri, Qırımtatar Milliy Meclisiniñ azaları, «Qırım birdemliginiñ» faalleri.
Advokat Edem Semedlâyevniñ bildirgenine köre, Rusiye uquq qoruyıcılarınıñ «ekstremist faaliyeti qabul etilmeycegine» dair ihtarları basqı ve qorquzuv aleti ola.
