Link açıqlığı

Saatnıñ esas haberi

Büyük Britaniya Qırım platformasınıñ kontseptsiyasına qol tuttı – Ukraina Tış işler nazirligi


Büyük Britaniya Qırımnı işğalden qurtaruv platformasını quruv kontseptsiyasına qol tuttı. Bu aqta elçi Melinda Simmons Ukraina Tış işler naziriniñ birinci muavini Emine Ceppar ile körüşkende ayttı.

«Melinda Simmons Qırım platformasınıñ kontseptsiyasına qol tuttı ve bu meselede ileride mesleat keçirmege azır olğanını bildirdi, Büyük Britaniya Ukraina suvereniteti ve topraq bütünligine sadıq qala, dep qoştı», – dep aytıla Ukraina Tış işler nazirliginiñ haberinde.

Körüşüv vaqtında taraflar halqara toplulıqnıñ diqqatı Qırım meselesinde ve Ukraina tarafınıñ «Qırımda insan aqları bozulğanda ve Azaq-Qara deñiz regionı Rusiye tarafından askeriyleştirilgende Qırım platformasınıñ qurulışı ve işindeki» fikirlerinde müim, dep qayd etti.

Sloveniya elçisi Tomaž Mencin Ukrainanıñ Qırım platformasını quruv teşebbüsine qol tuta, dep bildirdi.

Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

XS
SM
MD
LG