Büyük Onlar qasabasında suşi ve pitstsanıñ evge ketirilüvi ile oğraşqan "Erni Food" işhanesiniñ saibi qırımlı Ernest Celâlov Rusiye tarafdarı bloger Aleksandr Talipovnıñ areketleri sebebinden iş yerini qapatmaq mecbur qalğan.
Qapatıluv aqqında işhaneniñ "Vkontakte" içtimaiy ağındaki saifesinde yazılğan. Bundan ğayrı bunı Aleksandr Talipov da haber etti.
"Qapalımız! "Hayırhaq adamlarımızğa" ayrı teşekkürler! Sevimli dostlar, sadaqatıñızğa ve añlavıñızğa ümüt etemiz, tezden yañı vesiqalarnen işimizge devam etecekmiz!", - dep yazıla "Erni Food" saifesinde.
Talipovnıñ sözlerine köre, Rusiyede ve işğal etilgen Qırımda qısmiy seferberlik ilân etilgen soñ Ernest Celâlov Qazahistanğa ketken. Talipovnıñ şikâyetinine sebep Celâlovnıñ Qazahistanda vesiqa almaq içün Ukrayina elçiligine muracaat etkeni olğan.
Rusiyede ve işğali altındaki topraqlarda Ukrayinağa qoltutqan sakinler taqip etile. Rusiye tarafdarı bloger Aleksandr Talipov «Krımskiy SMERŞ» ve «TalipoV Online Z» Telegram kanallarında Ukrayinağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler. Ukrayina prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
