Rusiye ordusı işğal etilgen Qırımnıñ Saq şeeri yaqınlarındaki uçaq alanında yüz bergen patlavlar neticesinde eñ azı 8 arbiy uçaq ğayıp etken. Bunı Büyük Britaniya Mudafaa nazirligi memleketniñ istihabaratınıñ malümatına atfı etip haber etti.
"Patlavlar neticesinde eñ azı beş Su-24 qırıcı bombardıman uçağı ve üç Su-30 universal qırıcı uçağı ya da bütünley yoq etildi ya da ciddiy zarar kördi... Sekiz arbiy uçaqnıñ ğaybı Rusiyeiniñ cenk içün mevcut olğan umumiy parkınıñ kiçik bir qısmıdır. Amma esasen Saq Rusiyeniñ Qara deñiz flotunıñ aviatsiyasınıñ bazası oalarq qullanıla edi. Şimdi deñiz aviatsiyasınıñ imkânları sıñırlı", - dep yazıla bildirmede.
Şunı da qayd ettiler ki, bozuqlıqqa baqmadan, uçaq alanı qullanuv içün yararlı qalmağa devam etedir.
"Bu adise Rusiye ordusını telükeni ğayrıdan baqıp çıqmağa mecbur eterdir. Şübesiz ki, Qırım telükesiz cebe arqası kibi sayıla", - dep qayd etile bildirmede.
Avgustnıñ 9-nda yerli media Rusiye işğal etken Qırımnıñ Saq şeeri yaqınlarında Novofedirivkadaki arbiy uçaq alanında patlavlar aqqında bildirdi.
Rusiye akimiyeti «qomşu evlerden» tahminen 30 kişi tahliye etildi, dep bildirdi. Umumiy tahliye olmadı. Onlarnen mesken ev zarar kördi.
Rusiye Mudafaa nazirligi Novofedirivkadaki uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. Yoq etilgen tehnika körüngen yoldaş fotoresimlerine baqmadan, Rusiye arbiyleri uçaqlar zarar körmedi, dep bildire.
Ukrayına Mudafaa nazirligi Novofedirivka qasabasındaki arbiy uçaq alanında olğan patlavlarnı izaatlap, «yanğınlarnıñ sebebini bilmey», dep bildirdi. Ukrayına silâlı quvetleri Novofedirivkadaki aerodromda patlavlarnen alâqası olğanını resmiy şekilde tasdıqlamadı.
Ukrayına prezidenti ofisiniñ yolbaşçı muavini Mıhaylo Podolâk Kyivniñ Qırımnıñ Saq rayonındaki Novofedirivkada olğan arbiy aerodromda patlavlarnen alâqası yoq, dep ayttı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
