Ukrayinanıñ qarşı ücümi vaziyetinde Rusiye ordusı Kupânsk ve Liman yönelişinde büyük olmağan ücümlerni devam ete. Bunıñ aqqında avgustnıñ 26-nda yayınlanğan Büyük Britaniya istihbaratınıñ esabatında yazıla.
"Ukrayina cenüpte yavaş-yavaş mevzilerini azat etkeni içün, Rusiye mezebi onıñ teşebbüsni tutıp almağa tırışacağını tahmin ete", - dep yazıla bildirmede.
İstihbaratnıñ tahminlerine köre, böyle ücüm içün mümkün olğan yönelişlerden biri Kupânsk ve Liman sektorıdır.
Avgustnıñ 10-nda Kupânsk rayonında mecburiy tahliye ilân etildi. Arbiy areketlerge yaqın olğan 37 meskün yerniñ sakinlerine Harkivge ketmege teklif etildi.
Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
