Ukrayin uquq qoruyıcı teşkilâtları Rusiyeniñ tahqiqat tevqifhanesinde "Qırım musulmanları davası"nıñ mabüsi Cemil Gafarovnıñ ölümi aqqında haberni izaatlap, Rusiyeni bütün siyasiy mabüslerni deral azat etmesine çağırdı.
"Qırımlılarnıñ işğalge qarşı olğanları, öz fikirlerini bildirgenleri ve zorbalıqsız faaliyet köstergenleri içün taqip etilmelerini toqtatmaq. Halqara gumanitar uquqqa binaen Ukrayinanıñ muvaqqat işğal etilgen topraqlarında RF Ceza qanunnamesiniñ qullanmasını deral toqtatmaq", - dep talap ettiler uquq qoruyıcılar.
Bundan ğayrı, uquq qoruyıcılar halqara teşkilâtlarnı Cemil Gafarovnıñ ve "casuslıq" ile qabaatlanıp mahküm etilgen Konstantin Şiringanıñ ölümlerine alâqası olğanlarğa qarşı sanktsiyalar qoymağa çağıra.
Yanvarniñ 10-nda Rusiyeniñ Novoçerkask tahqiqat tevqifhanesinde "Qırım musulmanları davası" boyunca 13 yıl apis cezasına mahküm etilgen qırımlı siyasiy mabüs Cemil Gafarov vefat etkeni belli oldı.
Yanvarniñ 13-nde «Qırım birdemligi» qırımlı advokatlarnıñ aq qorçalayıcı ofisiniñ malümatına esaslanıp, «qırımlı musulmanlar davası» boyunca mahküm etilgen siyasiy mabüs Cemil Gafarovnıñ sağlıq vaziyeti «birden fenalaştı», dep bildirген эди.
Mabüsniñ ömür arqadaşı Raziye Gafarovanıñ aytqanına köre, cinaiy dava açılmazdan evel, 2017 senesi, keniş miokard infarktı oldı. O yıl büyrek yetmezligi aqqında aytqanlar. Siyasiy mabüs büyreklerniñ dializine muhtac, SİZO şaraitlerinde bunı yapmaq imkânsız.
Yanvarniñ 11-nde «qırımlı musulmanlar davası» boyunca qabaatlanğan qırımtatarlar Alim Karimov, Seyran Murtaza, Erfan Osmanov, Cemil Gafarov ve Servet Gaziyev Rusiye mahkemesi tarafından 13 yılğa azatlıqtan marum etildi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri Alim Karimov, Seyran Murtaza, Erfan Osmanov, Cemil Gafarov ve Servet Gaziyevniñ evlerini tintip, olarnı tuttı. Umumen 20-den çoq insan tutuldı. 2019 senesi martnıñ 27-nde ve 28-nde Aqmescitniñ Rusiye rayon mahkemesi episini apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan qırımtatar faallerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
