Qırımda iyünniñ 7-nde künniñ soñuna qadar furtuna havfı ilân etildi, küçlü yağmur, burçaq, boranlı yağmur yağması, saniyede 7-12 metr süratlı yel esmesi beklenile. Bu aqta Qırımnıñ Rusiye İç işler nazirliginiñ matbuat hızmeti bildire.
«Telükeli gidrometeorologik adiseler sebebinden suv basuvları, energetika obyektlerinde qazalar, mesken-kommunal hocalığınen bağlı fevqulâde vaziyetlerniñ peyda olması, naqliyat seferleriniñ bozuluvı, köy hocalığı ösümlikleriniñ zarar körmesi ve ölmesi mümkün», – dep aytıla haberde.
Müessise, reklama levhaları, yahşı qoyulmağan inşalar, terek ve elektrik hatlarınıñ bozulmasınen bağlı ealiniñ ayatı ve sağlığı içün telüke bar, dep qayd etti. Qara, Azaq deñizleri ve Keriç boğazında qazalar ola bile.
Hatırlatamız, iyünniñ 4-nde Qırımda yağacaq küçlü yağmurlar ve ruzgâr sebebinden furtuna havfı ilân etilgen edi. İyünniñ 2-nde Qırımda küçlü yağmurlar, boranlı yağmur, burçaq yağması, saniyede 15-20 metr süratınen yel esti.
Aqmescitte mayısnıñ 29-nda küçlü yağmur yağdı, yel bir çoq soqaqta tereklerni yıqtı. Suv Semaşko tibbiy merkeziniñ birinci qatını bastı. Bu lokal temizlev inşalarında avtomatika işinde bozuvlar sebebinden oldı.
Mayısnıñ 30-nda Aqmescitte küçlü yağmur yağdı, 30 millimetr yağanaqlar yağdı.
