«Bumboks» gruppasınıñ vokalcısı Andriy Hlıvnükniñ Qırım.Aqiqatqa bildirgenine köre, Rusiye işğali altındaki Qırımnı ve anda yaşağan insanlarnı sağına. Qırım mevzusı dünya kün tertibinde qalsın dep elinden kelgenini yapa, dep ayttı.
«Qırımnı pek sağınam, yarımadanı ve anda yaşağan insanlarnı pek sağınam. Qırım Ukrainanıñ mansardası degen fikirnen razı degilim. Qırım – evimizdir, çeşit milletke ait biñlernen ukrainalınıñ vatanıdır. Ukraina devleti ve ayrı şahıslar bu mevzunıñ dünya kün tertibinde qalması içün elinden kelgenini yapa – ve men olardan birim», – dedi Hlıvnük.
Qayd etkenine köre, Qırım onıñ içün raatlıq yerinden daa ziyadesi edi.
«Ebet, birileri içün Qırım tek merasim yeri edi – amma menim içün degil. Ebet, studentlik çağında anda raatlanmağa, soñra çıqış yapmağa barğan edik. Amma memleketimiz o qadar balaban degil, ve Ukraina adlı kiçik dairemizde yarımada müim yer alda. Anda tuvğanlarım, evim bar», – dedi sanatkâr.
2020 senesi sentâbr ayında «Bumboks» ukrain gruppası Kyivdeki kontsertte Rusiyede Bağçasaraydaki «Hizb ut-Tahrir davası» boyunca mahküm etilgen qırımtatarlarğa qol tuttı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
