Bulğaristannıñ ğarbinde yolcu avtobusınıñ qazası neticesinde eñ az 46 insan can berdi. Ölgenler arasında balalar bar. Yaralanğan yedi insan hastahanege alındı, dep bildire Azatlıq Radiosı.
Yol qazası yerli vaqıtnen gece saat ekilerde Bosnek köyü yaqınlarında oldı. İlk malümatqa köre, avtobus yol çitine urulıp yandı.
Avtobusnıñ Şimaliy Makedoniya nomeraları bar edi. Bu memleketniñ Tış işler naziri Buyar Osmani, avtobus raatlıq künleri Türkiye ziyaretinden soñ Üsküpke qayta edi, dep bildirdi. Anda turistler İstanbulğa bardı.
Yol qazası yerine barğan Bulğaristan İç işler naziri Boyko Raşkov, insanlarnıñ bedenleri «tamamınen yandı», dep tarif etti. Şimaliy Makedoniya baş naziri Zoran Zayev facia sebebinden Bulğaristan akimiyetinen bağda buluna, dep haber ete «BBC».
