Sabıq qırımlı siyasiy mabüs, Ukraina Yuqarı Radasınıñ deputatı («Avropa birdemligi» fraktsiyası) Ahtem Çiygoz, ekinci kere Bulğaristan prezidenti olaraq saylanğan Rumen Radev Qırımdan kelgen yarımadanı ziyaret etmek davetini qabul eteceginden şübhelene. Çiygoznıñ fikirince, Radev saylav munaqaşaları vaqtında aytqanlarından ileri ketmeycektir.
Bu fikrini o, Qırım.Aqiqatqa ayttı. Rusiye kontrolindeki Qırımnıñ bulğar cemiyetiniñ yolbaşçısı İvan Abajer Radevni yarımadanı ziyaret etmege davet etti, dep haber etildi.
«Bulğaristan, NATO ve AB azası olıp qala ve Radev memleketniñ tış kursını deñiştiremeycektir», – dedi Çiygoz.
Onıñ fikirince, (Rusiyege qoltutqan qırımlı siyasetçilerniñ – QA) daveti «adiy Rusiye propagandası» ola.
«Abajer Qırım yarımadasınıñ etnik bulğarlarını temsil etmey, o, Qırımdaki işğalci memuriyetni temsil ete», – dep ayta Çiygoz.
Rumen Radev noyabrniñ 18-nde prezident vazifesinde baş raqibi Anastas Gercikov ile keçirilgen munaqaşada Qırımnı «Rusiye toprağı» olaraq saya, dep ayttı. Radev, Rusiyege qarşı sanktsiyalarnı semeresiz dep adlandırdı.
Abajer emin ki, Radev yarımadanı ziyaret etse, «onı sıcaq ve samimiy qarşılarlar».
Onıñ aytqanına köre, bulğar cemiyeti ve «bütün qırımlılar» «qaviy ve işançlı Rusiye-Bulğaristan munasebetleriniñ» temelini qoyacaq Radev kelgenine quvanır.
Ukraina Tış işler nazirligi, Rumen Radevniñ işğal etilgen Qırımnen bağlı beyanatları sebebinden Bulğaristannıñ Kyiv elçisi Kostadin Kodjabaşevni çağırdı.
Ertesi künü Radev «Rusiye» Qırım aqqında laflarını tekrarlap, Qırım ilhaqını «halqara uquq bozuluvı» dep saya, dedi.
Ukraina aq qorçalayıcıları Bulğaristan akimiyetine muracaat etip, prezident Rumen Radevniñ beyanatını «qararlı şekilde takbih etmesine» çağırdı.
Bulğaristan prezidentiniñ Qırım laflarından sebep ABD Sofiya elçihanesi de qasevetlene, dep bildirdi.
Rusiye, Ukrainağa ait Qırımnı 2014 senesi fevral-mart aylarında işğal etti. Avropa Birligi, ABD ve diger memleketler Moskvağa qarşı sakntsiyalar kirsetti. Rusiye, yarımadanı öz toprağı sayıp, Qırım meselesi «qapatıldı», dep bildire. 2016 senesi Bulğaristan prezidenti Rumen Radev Rusiyege qarşı kirsetilgen sanktsiyalarğa qarşı çıqqan edi.
