Bugünki Rusiye ücüminden soñ Ukrayina prezidenti Volodımır Zelenskıy, er bir terroristik areket Ukrayinağa Rusiye terrorından qorunmaq içün daa çoq destek kerek olğanını isbatlay, dep bildirdi.
"Er bir Ava mudafaası sıstemesı, er bir raketağa qarşı sistema — canlarnı qurtara. Ortaqlarnıñ areket etmesi, añlaşmalarımızğa riayet etmesi ve Rusiyege qarşı basqını arttırması pek müimdir", — dep yazdı o telegramda.
O, hatırlattı ki, Rusiye ordusı Poltavada mesken evge kirdi, kiriş qapusı bütünley yoq etildi — üç kişi elâk oldı, daa on insan yaralandı, olarnıñ arasında balalar bar.
Onıñ aytqanına köre, Zaporijjâ, Odesa, Sumı, Harkiv, Hmelnitsk, Kıyiv vilâyetlerinde de zarar körgenler. Altı yaralanğan aqqında şimdilik belli. Harkivde Rusiye tarafından yapılğan uçucısız uçaq ücümi neticesinde bir insan elâk oldı, daa eki kişi Sumı vilâyetinde elâk oldı.
Rusiye arbiyleri çeşit silâlarnen muntazam sürette ukrayin regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.