Aqmescitte küçlü sağanaq ve burçaq yağacaq, dep haber ete Qırımnıñ gidromettsentri.
Sinoptiklerniñ malümatına köre, yaqın eki-üç saatta ve iyünniñ 25-niñ soñuna qadar Aqmescitte küçlü sağanaq, burçaq, boranlı yağmur yağması, saniyede 20-25 metr süratınen yel esmesi beklenile.
Şu sebepten furtuna havfı ilân etildi.
Daa evel haber etilgeni kibi, salı künü, iyünniñ 25-nde, bütün Qırımda ava bozulacaq.
Tünevin Yaltada bir qaç soqaq ve yerastı keçitni suv bastı, Aqmescitte ise elektrik naqil hatları bozulğanı içün şeerniñ bir qısmı ışıqsız qaldı.
Qırımda iyünniñ 26-ndan 29-na qadar yanğın telükesi yüksek olğanından ateş yaqmağa yasaq etildi.
