Budapeştte eñ azından yedi adam kezinti katerniñ qazası neticesinde elâk oldı. Daa 12-si ğayıp olğan sayıla, 15-ini qurtarıp oldılar. Bu aqta Azatlıq Radiosı bildire.
Beyanatqa köre, facia çarşenbe künü aqşam Dunay özeninde, Macaristan parlamentiniñ binası yanında oldı. Eki gemi çatıştı - 34 adamı olğan küçük kezinti kateri ve Viking kruiz layneri. Çatışmadan soñ kater avdarılıp, suv tübüne ketti.
Qurtarıcılar alâ daa ğayıp olğan insanlarnı qıdıra, amma Budapest avası buña maniadır. Devamlı sağanaqlardan soñ, Dunay taşa, özende küçlü aqıntı, suv arareti ise 15 derecede.
Katerde olğan yolcular Cenübiy Koreya vatandaşları edi, dep bildire Macaristan politsiyasınıñ vekili Kristof Gal.
