Macaristannıñ paytahtı Budapeştte Rusiye elçihanesiniñ binası ögünde Beyazrusiye ve Rusiyeniñ bütünleşmesine qarşı narazılıq aktsiyası olıp keçti. Bu aqta Azatlıq Radiosınıñ Beyazrusiye hızmeti haber ete.
Qadın faal Bella Foksnıñ aytqanına köre, Beyazrusiye, Rusiye, Ukraina ve Macaristannıñ yedi faali «Yaşasın Beyazrusiye!» dep şiarlarını seslendirdi.
Olar Rusiyeniñ çeşit memleketlerge olğan tesirine bağışlanğan narazılıq aktsiyasını teşkil etti.
Teşkilâtçılarnıñ aytqanına köre, yazuvlı şiarlarnıñ bir qısmını slovak siyasiy karikaturacısı Marian Kamenskiy sızdı.
Soñki bir qaç yılda Budapeştteki Rusiye elçihanesi ögünde çoq aktsiya oldı, olarnıñ arasında Azaq deñizinde tutulğan ukrainalı deñizcilerge qoltutuv aktsiyası bar edi.
Bella Foksnıñ bildirgenine köre, iştirakçiler Budapeşt sakinlerinen Beyazrusiye «yañı Qırımğa» çevirile bilecegi aqqında laf etti.
Daa evel Minskte yerli akimiyetnen keliştirilmegen narazılıq aktsiyaları olıp keçti. Olarnı dağıtmadılar, faqat teşkilâtçıları protokollarnıñ tizilmesi içün militsiyağa çağırıldı.
Bütünleşüvge qarşı çıqqanlarnıñ aktsiyaları prezident Aleksandr Lukaşenkonıñ Rusiyedeki muzakerelerine bağışlandı. Dekabrniñ 7-nde o, Soçide Rusiye zenaatdaşı Vladimir Putinnen körüşti. Rusiye akimiyeti İttifaq devleti çerçivesinde bütünleşüvniñ terenleşüv meselesini kötere. Beyazrusiye muhalifetiniñ vekilleri, muzakereler neticesinde memleket suverenitetini coya bile, dep qorqa.
