Budapestte Dunay özeninde küçük kezinti kateri ve “Viking” kruiz layneri çatışuvında elâk olğanlarnıñ sayısı 11-gece arttı. Bu aqta Associated Press agentligine esaslanıp Azatlıq Radiosı bildire.
Cenübiy Koreyadan bir elâk olğan insannıñ cesedi, qaza yerinden 58 km mesafede tapılğan. Em daa dayverler, suv tübünde 9 metr terenlikte olğan batqan katerden qadın cesedini köterdi. Daa bir tapılğan cesetniñ şahısı belli degil.
Qıdıruvğa küçlü yel keder ete edi.
Mayıs 29-ında aqşam Dunayda Margit köprüniñ ögünde eki özen gemisi çatıştı. “Rusalka” küçük özen kezinti katerinde 35 adam edi (gemi kapitanı ve matrosı (macarlar) ve Cenübiy Koreyadan 33 yolcu), “Viking” büyük kruiz laynerinen çatışqan soñ o pek tez, 7 saniyede batıp ketti. Cenübiy Koreyanıñ yedi vatandaşı sağ qaldı. Daa üç yolcunı Budapestte Ladmanyoşi köpründen üç kilometr uzaqlığında taptılar.
Macaristan paytahtı Budapestte mahkeme, Ukraina vatandaşı olğan kruiz gemisiniñ kapitanını tevqif etmege qarar aldı.
