Ukrayına Mudafaa nazirligi Baş istihbarat idaresiniñ yolbaşçısı Kırılo Budanov FT içün intervyüsında işğal etilgen Qırımda mahsus operatsiyalar devam etecek, dep bildirdi. Bu aqta «Suspilne» cemaat yayınlayıcısı haber ete.
Budanovnıñ aytqanına köre, yarımadağa qarşı avadan ücüm etilmeli, deñiz darbe uçucısızları qullanılmalı, gizli mahsus operatsiyalar keçirilmeli.
«Bölüklerimiz (bıltır – QA) Qırımğa çoq kirdi», – dep ayttı Ukrayına istihbaratınıñ reberi.
Bundan ğayrı, Budanovnıñ qayd etkenine köre, missiya prioritetlerinden biri – işğal altındaki Qırımda Rusiye Federatsiyası Ava quvetleriniñ logistikasını bozmaq.
The Wall Street Journal yazğanına köre, Ukrayına Silâlı Quvetleriniñ baş komandanı Valeriy Zalujnıy 2022 senesi Qırımğa «qara koridornı» bozmağa ve Rusiye ordusını Qırım yarımadasında izolâtsiya etmege planlaştırğan edi.
Budanov Qırım.Aqiqatqa bergen intervyüsında Qırımnıñ qaytarıluvı qarışıq yolnen yapılacaq, dep bildirdi. Ukrayina istihbaratınıñ yolbaşçısı bu yolnıñ ne olğanını añlatmadı.
Keçken sene avgustnıñ 28-nde Ukrayina prezidenti Volodımır Zelenskıy, Ukrayina silâlı quvetleri Qırım sıñırlarına çıqqan soñ, yarımadanı azat etüvniñ siyasiy yolu aqqında aytmaq mümkün olacağını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
