Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanov The Economist neşirine intervyü berip, Ukrayına ordusı Rusiye işğal altındaki Qırımğa qullanğan qara koridorını qış kelmezden evel boza bile, dep bildirdi.
Neşir qayd etkenin köre, Ukrayına sıñırlı sayıda olsa da, yedek ordusını celp etkendir. Bunıñnen beraber, Rusiye oktâbrniñ soñuna qadar qullanmağa planlaştırmağan yeterli qadar küçlü olmağan yedeklerni celp etti, dep yaza jurnalistler Baş istihbarat idaresiniñ yolbaşçısı bergen malümatqa esaslanıp.
«Rusiye Federatsiyası bergen malümatqa baqmadan, onıñ strategik yedekleri yoq», – dep qayd etti Budanov.
Onıñ aytqanına köre, Liman ve Kupânsk etrafında şarqiy cebede açılğan 25-nci Rusiye umumarbiy ordusınıñ tek 80% askeri ve 55% tehnikası celp etildi.
Budanov, seferber etilgen yedekniñ sayısı Rusiyeniñ yekâne üstünligi ola, dep qoştı. «Rusiyeniñ insan yedekleri sıñırsız, dep aytmaq mümkün. Keyfiyeti yahşı degil, amma sayısı yeterli», – dedi istihbarat yolbaşçısı. Onıñ aytqanına köre, diger Rusiye yedekleri de bite.
Ukrayına Silâlı quvetleriniñ Qara ordu komandanı Oleksandr Sırskıy Rusiye şarqta revanşqa azırlana, dep bildirdi. Onıñ aytqanına köre, Liman yönelişine Rusiye Baş ştabı yañı qurulğan 25-inci Rusiye umumarbiy ordusınıñ bölüklerini attı.
Amerikanıñ cenkni tedqiq etüv institutınıñ (ISW) talilcileri sentâbrniñ 1-nde qayd etkenine köre, 25-inci ordunıñ bölükleri 41-inci umumarbiy ordunıñ bölük yerlerini almalı. Olarnı ise cenüpteki cebege avuştırmaq kerekler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
