Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanov «Qırımda işğalcilerni yoq etecek tirenüv areketiniñ tedbirlerini» ilân etti. Ukrayına istihbaratınıñ yolbaşçısı bunı İrpin şeer yolbaşçılığı ögünde ayttı, anda «Qırım platforması» sammiti arfesinde qırımtatar bayrağı köterildi.
«Pek qorqqan soyları bar, amma beklegenler de çoq. Olarnıñ ümütleri boş olmağanına işandırmaq kerek. Şunıñ içün Qırım platforması kibi tedbirlerni keçirmek kerekmiz, vaqtınca işğal etilgen topraqlarda tirenüv areketi olmalı, bizim Qırımda işğalciler yoq etilmeli. Bular yapıla ve bu künleri daa köreceksiñiz», – dedi Budanov.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
