Bir qaç kütleviy haber vastaları, şu cümleden Qırım.Aqiqat Ukrayına istihbaratınıñ yolbaşçısı yapqan beyanatqa esaslanıp, Qırımdaki poligonda çıqqan yanğın Ukrayına Silâlı quvetleri ve Baş istihbarat idaresi kerçekleştirgen operatsiyanıñ neticesidir, dep bildirdi.
Haber böyle edi: «Duşman körgen zararlarnı ve ölgen asker sayısını gizley. Qırımdaki Ukrayına vatanperverlerine bergen malümatları içün teşekkürler».
Müessise vekili Andriy Yusov kütleviy haber vastaları esaslanğan telegram kanalı sahte ola, dep bildirdi.
Oquyıcılarımızdan afu soraymız.
İyülniñ 19-nda saba belli olğanına köre, Qırımnıñ İslâm Terek rayonınıñ Kriniçki köyü yanında poligon yana – anda silâlar patlay, dep bildire yerli Telegram kanalları. Olarnıñ malümatına köre, patlavlarnıñ sebebi üç ücüm oldı.
Yarımadanıñ Rusiye yolbaşçısı Sergey Aksenov «Tavrida» yolu qapatıldı, dep bildirdi. Onıñ aytqanına köre, poligonğa yaqın dört mesken yerden sakinler (eki biñden ziyade insan) tahliye etilecek.
Mayısnıñ 10-nda Azatlıq Radiosınıñ leyhası olğan Qırım.Aqiqatjurnalistleri 2014 senesi Rusiye tarafından işğal etilgen Qırım yarımadasınıñ Rusiye Federatsiyasınıñ 223 çalışqan, muvaffaq ve qapalı arbiy obyektleriniñ haritasını derc etti. Anda iyülniñ 19-nda patlav ve yanğınlar olğan «Starokrımskiy» poligonı da qayd etilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
