Ukrayına istihbaratınıñ yolbaşçısı Kırılo Budanov Ukrayına Silâlı quvetleriniñ qarşı ücümi «planğa köre kete», dep bildirdi. Amma onı yerine ketirüv planını seslendirmeycek. Bu aqta NV.ua haber ete.
«Qısqası – şaşılacaq ve tez olacaq», – dedi Budanov.
Ukrayına istihbaratınıñ yolbaşçısı Rusiye strategik mudafaa operatsiyasına keçti, dep tüşüne: olarnıñ vazifesi – zapt etilgen topraqlarnı tutmaq.
Jurnalist istihbarat yolbaşçısına baarde Ukrayına Qırımğa kirecek degen sözlerini hatırlattı. Budanov «daa vaqtımız bar», dep cevap berdi.
Soñki künleri Ukrayınanıñ ücüminen bağlı daa çoq laflar bar. Vaqtı ve yeri aqqında bir şey belli degil. Bazıları Ukrayına ordusınıñ maqsadı olaraq Donbasnı, digerleri işğal etilgen Qırımnı ayta.
Ben Hocesniñ fikirince, qarşı ücüm Qırımnı azat etmek içün yapılacaq. Onıñ fikirince, yarımadanıñ işğalden azat etilüvi müim vazife ola, bu «topraq prioritetlidir».
Uydu resimleri Qırımnıñ şimalinde «Ermeni Bazar» ve Perekop Rusiye keçiş noqtaları rayonında çift oko yolağı bar, dep köstere. Uydu fotoresimleri E-105 yolunıñ eki tarafında da ve Sivaş gölü yanında yañı fortifikatsion inşaatlarnı kösterdi.
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirgen edi.
Soravlar köstergenine köre, ukrayınalılarnıñ 60%-dan ziyadesi işğal etilgen Qırımnıñ cenk yolunen azat etilüvine qoltuta – Rusiye ile cenk daa uzun olsa ve Ğarpnıñ yardımı eksilse bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
