Ukrayına Silâlı quvetleri «tezden Qırımğa qaytacaq». Bu aqta Ukrayına istihbaratınıñ yolbaşçısı Kırılo Budanov Natalya Moseyçukqa bergen intervyüsında ayttı.
«Men anda (Qırımğa – QA) çoq bardım. Bu menim ekinci vatanım. Ve anda qaytacaqmız. Tezden. Silânen qaytacaqmız», – dedi Budanov.
O, Ukrayına Silâlı quvetleri 2023 senesiniñ baar soñuna qadar yarımadağa kirer, dep tahmin ete.
«Belki, biraz daa erte. Künlerde yañlışlıq ola bile, amma algoritmde olmaz», – dedi Ukrayına istihbaratınıñ reberi.
Ukrayınanıñ ABD elçisi Oksana Markarova Kyivniñ ABD tarafından Qırımdaki Rusiye arbiy obyektlerine Amerika silâsınen darbe endirüv sıñırlavları yoq, dep bildirdi.
Sentâbrniñ 7-nde Ukrayına Silâlı quvetleriniñ baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine qarşı Ukrayına arbiyleriniñ raketa darbelerini tanıdı. Ukrayına mudafaa nazirligi qırımlılarnı Qırımdaki Rusiye ordularınıñ yerlerini «eVoroğ» çat-botuna bildirmege çağırdı.
The New York Times neşiri Ukrayına memurınıñ malümatına esaslanıp, Qırımdaki patlavlar «elit Ukrayına arbiy bölügi» yardımınen kerçekleştirildi, dep bildirdi. Memur gizli qalmaq şartınen laf etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
