Ukrayina Mudafaa nazirliginiñ Baş istihbarat idaresiniñ yolbaşçısı Kırılo Budanov Qırım.Aqiqatqa Qırımnıñ işğalden azat etilecegi tarihı ile bağlı tahminler aqqında aytıp berdi.
"Ebet, biraz grafikten uzaqlaştıq. Vaqialar tahmin etilgeninden yavaşça inkişaf etkenini qabul etemiz. Olğanı budır. Amma Qırımğa ve anda yüz bergen arbiy areketlerniñ seviyesine baqsaq deñişmeler elbette bar. Çünki 2022 senesinece bir şey yoq edi. Yani maqsadımızğa ketemiz. Yavaş olsa da ketemiz", - dep bildirdi Budanov.
Aynı zamanda Budanovnıñ qayd etkenine köre, istihbaratnıñ tahminleri "faktlarğa, raqamlarğa, adiselerniñ ketişatına, iqtisadiy köstergiçlerge" esaslana. Amma bundan ğayrı uruş meydanından olğan kerçeklik de bar. Ve andaki kerçeklik tahmin etilgeninden daa az şiddetlidir.
Evel Ukrayina prezidenti Volodımır Zelenskıy qarşı ücüm bir «Gollivud filmi» degil, çünki «insanlarnıñ ayatı bar», dep qayd etken edi. Ukrayina Silâlı quvetleriniñ baş komandanı Valeriy Zalujnıy Ukrayınanıñ qarşı ücümi «beklengenden daa yavaş» kete degen sözler onı «açuvlandıra» dep bildirgen ve Ukrayınanıñ azat etilgen er bir metri «qannen berile», dep qoşqan edi.
ABD ştabları yolbaşçılarınıñ birleşken komitet yolbaşçısı general Mark Milli Ukrayına Silâlı quvetleriniñ qarşı ücümi «kesen-kes ileriley», amma devamlı ve «pek qanlı» olacaq, dep ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
