Ukrayina Mudafaa nazirliginiñ Baş istihbarat idaresiniñ yolbaşçısı Kırılo Budanov FT intervyüsında ilhaq etilgen Qırım territoriyasında mahsus operatsiyalar devam etecek, dep bildirdi. Bu aqta ''Suspilne'' cemaat yayınlayıcısı bildire.
Budanovnıñ aytqanına köre, yarımadağa avadan ücüm etmege devam etmek, deñiz ücüm uçaqlarını qullanmaq ve gizli mahsus operatsiyalarnı keçirmek kerek.
"Bizim bölüklerimiz (keçken sene - QA) defalarca Qırımğa kirgen edi", - dep añlattı ukrayin istihbaratınıñ yolbaşçısı.
Bundan da ğayrı, Budanovnıñ qayd etkenine köre, missiyalarnıñ prioritetlerinden biri - Qırımdaki RF Silâlı quvetleriniñ logistikasını yoq etmektir.
Daa evel The Wall Street Journal yazğanına köre, Ukrayina arbiy quvetleriniñ baş komandanı Valeriy Zalujnıy 2022 senesi Qırımğa "quru topraq yolunı" bozıp, Qırım yarımadasında Rusiye ordularını izolâtsiya etmege planlaştıra edi.
Budanov Qırım.Aqiqatqa bergen intervyüsında Qırımnıñ qaytarıluvı qarışıq yolnen yapılacaq, dep bildirdi. Ukrayina istihbaratınıñ yolbaşçısı bu yolnıñ ne olğanını añlatmadı.
Keçken sene avgustnıñ 28-nde Ukrayina prezidenti Volodımır Zelenskıy, Ukrayina silâlı quvetleri Qırım sıñırlarına çıqqan soñ, yarımadanı azat etüvniñ siyasiy yolu aqqında aytmaq mümkün olacağını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
