Aprelniñ başında Rusiye ordusından azat etilgen Kyiv vilâyetiniñ Buça şeerinde işğal vaqtında elâk olğanlarnıñ cesed çıqarıluvı yekünlene, dep bildirdi şeer yolbaşçısı Anatoliy Fedoruk.
Onıñ aytqanına köre, şimdi elâk olğan 412 insan aqqında haber etildi, yaralanğanlarnen bağlı tam malümat daa yoq.
«Bugün olğan raqam – 412 (elâk olğanlar – muar.). Amma er şey daa tatilsiz çalışqan tahqiqatçı ve ekspertler seviyesinde teşkerilecek. Demek, Kyiv vilâyetinde elâk olğan er üçünci kişi – Buçadandır. Yaralanğanlarnı daa sayamız. Bogdan Hmelnitskiy, 7-b soqağında Andrey Pervozvannıy Kilsesi ögünde qardaş mezar ayrı dava oldı, andan 117 cesed çıqtı, 30-ı qadın ve eki bala», – dep yazdı Fedoruk Facebook saifesinde aprelniñ 23-nde.
«Anda işğalciler tarafından öldürilgen, atılıp öldürilgen ve ölgenine qadar qıynalğanlar, yanğan vatandaşlarnıñ cesedleri bar. Fevralniñ 24-nden soñ defin etelmegen hastahane hastaları bar, çünki rusiyeliler mezarlıqqa kirsetmey edi. Ukraina Silâlı quvetlerinden bir qaç kişi bar», – dep qoştı şeer yolbaşçısı.
Onıñ aytqanına köre, şeer ögünde turğan esas vazife elâk olğan er bir insannıñ kimligini bilmektir. Fedoruk, yerli akimiyet eñ yaqın aftaları öldürilgenlerniñ qorantalarına yaqınlarını kömmek içün yardım etmege istey, dep bildirdi.
«Birini daa çıqarmağanlarına dair malümatıñız olsa, ya da hadimlerimiz ve göñüllilerimiz sizge yardım etip olamasa, izaatlarda yazıñız, ayrı baqıp qıdıracaqmız. Bu bizim umumiy felâketimizdir. Ve bu bizim vazifemiz – qabaatsız öldürilgen er biriniñ kim olğanını bilmek ve keregi kibi defin etmek», – dep ayttı şeer yolbaşçısı.
Aprelniñ 2-de Kyiv vilâyeti Rusiye ordusından azat etildi. Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı.
Ukraina ve bazı Ğarp vekilleri Rusiyeni Kyiv vilâyetinde olıp keçken cenk cinayetleri içün mesüliyetke çekmege talap ete.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
